St Barbe et J Mousseron

24 novimpe 1943. Ech poète d'el mine, Jules Mousseron, il o moru. (1) Il o v'nu au monte à ch' Coron Plat à Denain, el prémier janvier dije-huit chint soéxante-huit. Ch'est l' troésième éfant ed Marie-Josèphe Fleurant et pis d' François, un viel éfant truvé, un parisien (2) pétête, à l' queul on n'o baillé (3) un biau nom d' parapuie d' chorchelle, d' pain d' crapaud (4), d' biau temps (5) appélé mouch'ron. (6)

   Galibot comm' sin père, il o suit (7) el carrière d' ches mineux: r'léveu d' terre, freinteu, hiercheu d' coupes, méneu d' quévaux, piqueu à l' veine !...

   I publie sin prémier life "Fleurs d'en bas" in patoès rouchi in 1897 et baro (8) à l' postérité à l'intour ed troés chints poèmes. Sin talent il est vite arconnu par elz' autes poètes et sintant qu'il o d'vénu célèpe, il organise des soérées bachiques et des concherts (9) pou' li archuvoir d' l'argint pou ches paufes.

   Ch'est ch' créateu d'un type arconnichape (10) dins ches corons, Zeph Cafougnette, mineu (11) faijeu d'imbarras, avocat (12), beuveu, braillard, mais brafe, corageux, serviape et toudis in train d' déblouquer sin coeur. (13) Et ch'est qu'on in dit core des "cafougnettes" dins ches masons d' ches gins d'ech Nord. Et cha fait toudis rire à maronne déblouquée... (14)

(1) il est mort; (2) enfant assisté du département de la Seine; (3) donné; (4) champignon; (5) de printemps; (6) mousseron; (7) suivi; (8) donnera; (9) concerts; (10) reconnaissable; (11) mineur; (12) vantard, hâbleur; (13) dire franchement et carrément ce qu'on pense; (14) rire à ventre déboutonné.

Dins sin life "Au pays des corons" (dédié à s'n' ami Arthur Carpentier) qu'il o paru pou' l' prémière foés in 1907, il o écrit un poème appélé "L' Fête Sainte-Barbe".

"V'là aujourd'hui cent ans (viu arfrain)  Qu'in a trouvé saint' Barbe au fond  Avec es' lampe à s' barrête,  Ses othieux (1) à sin côté,  Assis sur eun' gross' gaillette (2),  In train d' minger s' briquet." (3)

(1) outils; (2) morceau de charbon; (3) grosse tartine.

   V'là l' saint' Barb' ? lé v'là, not fiête  A s'amuser, in s'apprête.  In va vir qué l' bonne humeur  N' désert' point souvint l' mineur, Hier, dins l' coron, les femmes  All's sé sont mis' hors d'ell'-mêmes  Pou trouver un tiot bouquet  A l'homme qui l'a bien gagné.

   L'homme n'a pus pinsé à s' peine. Quand i-est rintré del quinzaine  Et qu'il a vu s' tiot infant  S'approchant d' li in trannant, Li donner l' bouquet pou s' fiête: "Tiens, papa, j' té la souhaite !"  Oh ! comme l'ouverrier, contint,  S'est mis à baiser l' gamin.

   Comm' l'homm' f'sot mill' bais's au gosse  L'femme qu'in voulot un tiot cosse,  All' s'est écrié: "Eh bin !   Queu nouvell' ? mi, j' n'in ai point ?"

   Alors, l'homm' s'a laissé faire:  Il a imbrassé s' commère.  Pis in a soupé, joyeux,  In buvant un cop, mêm' deux.

   Aujourd'hui, - ch' n'est point un vice,-  Des kilomètres d' saucisse,  Cuite avec des rondiaux d' pons (1),  Ont été miés (2) dins l' coron. (1) pon: pomme; (2) mier: manger.

   A ch't'heure, ahu' ! qu'in s'amusse !  Qu'in n' busich' (1) pas à ses russes !  In a terminé l' traval  Sans malheur: ch'est l' principal. (1) busier: réfléchir.

  Pis, au soir, i faut qu'on danse,  Intré deux pousser l' romance...  Ch'est biau d' savoir travailler  Et d'honnêt'mint s'amuser.

   Crions à findr' nos capotes:  "Viv' saint' Barbe et vive nous autes !  J' vous souhaite à tous, bonn' gins,  Eun' gross' berlin' d'amus'mints..."

   L' mineur peut, après la fête,  L' soir, - s'il rintre in peu pompette, -  Répondre à s' femm', qui l' grondera,  In s'infutant dins les draps:

   "V'là aujourd'hui cent ans  Qu'in a trouvé Saint'-Barbe au fond  Avec s' barrêtt' su s' tiête,  Ses othieux à sin côté...  Un bouquet de violettes:  Vivent les carbonniers !"    Jules Mousseron.

A preupos d' nou parlache.

   Ech ch'ti u bien chtimi, cha n'est poent, comme on l' croèt souvint, eune défourmation  (1) d'ech français. Ch'est eune d' ches variantes, parlées dins ch' Nord et dins l' Pos-d' Calais, d' chelle lanque picarde.

    Ech picard, arconnu officiell'mint comme l'eune d' ches soéxante-quinse lanques ed France, i vient, comme el français, d'ech latin populaire eq' nous rataïons (2), ches Gauloés, is parloètt'nt-té.

   Ech français et ch' picard, ch'est deux lanques d'oïl, par opposition à ches parlaches d'oc d'ech Sud d'el France: is ont simpèl'mint suit (3) des c'mins différints. Ech français, il o connu, edpis, ech succès qu'os savez.

   On parloèt ech picard, aveuque ses différintes variations, dins tout nou région (hormis chelle Flande in-dzous d' Dunkerque), dins l' Somme, l'Aisne d'ech Nord et eune grande partie d' l'Oise, ed même eq' dins echl' Hainaut bège, à l'intour d' Tournai et d' Mons.

(1) déformation; (2) ancêtres; (3) suivi; (4) chemins.

N.B. Le patois picard du Hainaut, en particulier de Valenciennes et des environs, est appelé "rouchi" ("drouchi", à cause, disait-on, du fréquent usage qu'il fait de la locution "drou")(nom donné par Gabriel Hécart, au début du XIXe siècle, à partir de "drochi" (ici; "drolo", là-bas; droit par ici, droit par là).

Nou patoés, os allez l' laicher querver !

   "Faire surnager et soutenir au-dessus de l'oubli (...) un fragment d'une langue quelconque que l'homme a parlée (...), c'est étendre les données de l'observation sociale, c'est servir la civilisation même."

   Queu biau parlache ! Qui qu' ch'est n' n'est qui étoèt bien à paroles ? (1) - Té pâlles ! Cha n'est poent du parlache, i sânne à vir eq' ch'est putôt d' l'écriture ! Gn'in n'éro pétête poent gramint qui prouvaront l' contraile !

- Quoé qu'i n'in seuche, ch'est bien dit: gn'in n'o tell'mint qui ditt'nt-té toudis sans savoir cho qu'is ditt'nt ! - Nan, cha n'arsânne poent à ches diries (2) u bien à des parlaches ! (3) - Ch'étoèt un rude écrivassier ! (4) - Lo, ej t'arprinds tout sèqu'mint, vite et rate, têt' d'innochint ! Ti, eq' t'os d'el blague (5), té d'vros savoir eq' ch'est nou meilleu écriveux ! Ti, aveuque tes solets crottés (6), té n'arrivros jamais à s' chévil !

- C'mint qu' té dis ! Tête' d'agozile ! Si té continues à m' cacher margache (7), ej té flanqu'rai un rude agarot ! (8) - Bez, on n' vo poent nous agoniser (9) d' tous nous mécans'tés ! - Ouais, os sommes core capapes d' parlanter comme edz honnêtes gins fin conv'napes ! - J'aveus laiché dire qu'il éteut mort ? - Ouais, gn'o pus d'un sièque..., presse chint-vingt-chinq ans !

- Dins ch' temps-lo, ches serveux à tape is décrappoètt'nt-té (10) un molé in servant leu maîte ! - Edù qu' ch'est qu'il est ch' biau temps-lo ? - J' m'el ramintus... du temps d' nous vert'é cauches (11), ech maîte d'école i nous impêchoèt d' parler patoès... - I nous éroèt foutu eune ramonnure... (12) - I nous éroèt tapé su nous doègts aveu sin rèque... (13)

- I nous dijoèt intèr' quat' z' yus eq' ch'étoèt poent biau d' parler patoès... - "T'ènn' n' éros d' l'école (14) aveuqu' tin fiston qui n' veut poent apprinde nou français !" qu'i dijoèt à min père... - Cha li pindoèt à sin nez comm' un sifflet d' deux yards... El lanque d' nous taïons rataïonnés (15), all' étoèt déjo comme des choux tout langreux. (16)

- A' n' n' avoèt pus pou longtemps à vive... - A' s' f'ro pus langu'ter ! (17) - Ravise, nous, on l' pâlle core, nou patoès ! On l' comprind... Mais, nous éfants ! - Eh ben, dins ches fac... occultées... - Dins ches facultés... - Ouais, is' n' n' pourroètt'nt-té poent el l'apprinde nou picard ?  - Nan, gn'o queuqu's années d' cho, gn'o un minisse (18) qui l'o dit comme cho qu' ch'étoèt poent eune lanque, nou picard. Ch'est trop variape d'un cuin à un aute... All' varzinne (19) toudis !

- Et nou français, té croès qu'i n'o poent varié d'pis queuqu's sièques ! Et pis core aveuqu' tous ches mots d'inglais qu'is int'nt-té eddins tous les jours !  Ejou qu' ch'est ben vrai ? - Ouais, ch'est vraimint vrai... Ravise Victor Hugo, i c'minche à s'armuvoir dins sin cherqueule tell'mint qu'il est mingé à chinchelles ! (20)

- Bétôt, on diro étou d' nou français: "Cha a d' beaux ch'veux !" (21) - J'ènn' n'a mau à mes caveux ! J'a pus cair m'in aller...

Allez, à bétôt...  pétête !

(1) avoir l'éloquence facile; (2) dires, bavardages, médisances; (3) paroles inutiles; (4) écrivain sans grande instruction; (5) parler beaucoup et avec facilité; (6) souliers pleins de boue; (7) chercher dispute; (8) une verte réprimande; (9) insulter; (10) se former aux usages du monde; (11) au temps de notre jeunesse; (12) réclée; (13) règle; (14) avoir du tracas; (15) trisaïeuls; (16) rabougris; (17) faire parler de soi en mal; (18) ministre; (19) avoir des caprices; (20) être tracassé au point d'en perdre le sommeil; (21) se dit de ce qui est en mauvais état, usé ou de ce dont on ne peut tirer parti.

   "La sincérité vivante me parlait par cette bouche (celle de Mousseron) et dans ce patois, aux sonorités presque germaniques, mais latin pourtant et qui s'est manifesté jusqu'ici l'instrument le plus sûr de l'avancée française vers le nord flamingant. La mélodie particulière qui l'enveloppe offre une gamme expressive d'énergie et de songe mêlés; le français pur ne donne pas cela." (Philéas Lebesgue)

(1) Robert Burns (voir photo 3)